APRENDER A PENSAR NA BIBLIOTECA ESCOLAR- RESOLVEMOS ENIGMAS

Este mes comezamos resolvendo enigmas dentro das actividades do monográfico "Aprender a pensar na biblioteca escolar".
Cada semana Lolo vai  propoñernos un para que os nenos e nenas os resolvan. Escribirán a solución nun papel (de diferente cor para cada aula) e meterán as respostas no buzón.
Cada semana daremos a coñecer a clase na que houbo máis acertantes... e terán un gran premio.
AINDA QUE OS MÁIS IMPORTANTE É POÑER AS NEURONAS A TRABALLAR E SER QUEN DE RESOLVER OS ENIGMAS!

Nas fotos vemos o primeiro deles e aos nenos e nenas de 1º que foron á biblioteca e botaron no buzón os papeis coa solución.... sorte chicos!

E ti... sabes a solución?
Podes escribila mandando un correo a
www.abibliocovas@gmail.com

Enigmas1

PROMOCIÓN PATRULLA VERDE

PROMOCIÓN PATRULLA VERDE from Bibliocovas on Vimeo.

Os alumnos de 2º de Educación Primaria, motivados pola iniciativa “mensaxe nunha botella”, decidiron formar a Patrulla verde. Un grupo de alumnos e alumnas que vixiarán que se manteña limpo o patio e se recicle correctamente. Para animar ao resto dos nenos e nenas do colexio a formar parte dela gravaron este anuncio publicitario que foi todo un éxito. Agora xa son máis de 100 membros, que patrullarán á hora do recreo a partires do vindeiro 1 de febreiro.

APRENDER A PENSAR NA BIBLIOTECA DE COVAS

APRENDER A PENSAR NA BIBLIOTECA ESCOLAR

Este é o título do proxecto monográfico que imos levar a cabo durante o segundo e terceiro trimestre dende a biblioteca.

 Este proxecto está adicado á filosofía e o proceso de aprendizaxe e como obxectivo fundamental queremos "fomentar a curiosidade dos nenos/as sobre o proceso do pensamento e a actitude crítica así como ensinar aos nenos e nenas a pensar".

Obxectivos

-Motivar aos nenos e nenas cara ao proceso da mente, como desenvolver a intelixencia.

- Buscar información na rede sobre os pensadores/filósofos máis relevantes e os campos nos que desenvolveron as súas investigacións.

- Fomentar a curiosidade e a creatividade.

- Empregar a bibliografía sobre o tema, especialmente libros informativos, xogos de pensar, xogos de mesa, a internet.

- Traballar en equipo.

- Buscar a colaboración das familias para actividades relacionadas co tema.

O APALPADOR ESTIVO NO COLEXIO E FESTA DE FIN DE TRIMESTRE

Visitounos o Apalpador que nos leu o libro "O Apalpador e a castaña máxica" posto en escena polos residentes de DomusVi (antes Geriatros). Para rematar o trimestre achegouse ata o centro Papá Noel e un Rei Mago. Entre los dous entregaron unha morea de agasallos para os nenos, nenas, profesorado e personal non docente do centro. Os nenos e nenas de infantil e primaria cantaron unhas panxoliñas adicadas aos nosos invitados especiais. Despois fumos todos á biblioteca para ver unha obra de teatro representada polos nenos e nenas de 6º que forman parte do Equipo de Colaboradores/as da biblioteca. A obra levaba por título "Que lio de libros" facendo referencia á organización e formación de usuarios da biblioteca e remataron cun Bibliorap.

Panxoliñas e visita do Rei Mago e Papá Noel. from Bibliocovas on Vimeo.

O Apalpador - Que lío de libros! from Bibliocovas on Vimeo.

MERCADILLO SOLIDARIO EN DOMUSVI- OS DE 6º IMOS DE COMPRAS

O día 14 de decembro fumos ata a Residencia de Maiores Domusvi (antes Geriatros) onde se celebrou un Mercadillo Solidario a favor da Cruz Vermella para comprar xoguetes que recibirán os nenos e nenas que non teñen recursos.
Os nenos e nenas do centro dende Infantil ata 6º de primaria fixeron  manualidades para vender no mercadillo. Houbo moita variedade: postais de Nadal, bolsas para agasallos, colgantes, caixas de regalo, imáns feitos con pinzas, bolas de neve, estrelas, coronas... todo feito con moita ilusión para colaborar nunha acción tan fermosa.

No mercadillo solidario en DomusVi from Bibliocovas on Vimeo.

Ademais os nenos e nenas de 6º estiveron aforrando para ser solidarios. Despois de visitar o Mercadillo aproveitamos para entrar nun supermercado do barrio. Cos cartos que aforraron na compra de chuches, mercamos alimentos non perecedeiros (legumes, pasta, café...) para dar a Cáritas cara á campaña de Nadal. Pasámolo moi ben facendo as compras e imos seguir aforrando para colaborar en causas solidarias.
OS/AS DE 6º IMOS DE COMPRAS SOLIDARIAS from Bibliocovas on Vimeo.

OBRADOIRO DA BANDA DE GAITAS CACHARELA DE COVAS

Tivemos a visita de dous integrantes da Banda de Gaitas Cacharela de Covas. O director Rodrigo e Héctor, un antigo alumno do centro, explicaron aos nenos e  nenas os instrumentos de percusión que tocan na banda. Dende as cunchas ata o bombo, ensinaron as diferentes partes e tocaron algunhas pezas.  Tamén tocaron a gaita e invitaron á alumna Sara López, que interpretou duas cancións con eles.

Banda de Gaitas Cacharela de Covas from Bibliocovas on Vimeo.

APRENDER A PENSAR COA BIBLIOTECA ESCOLAR

"Aprender a pensar coa biblioteca escolar" é o lema escollido para os materiais que a Consellería de Cultura, Educación e Ordenación Universitaria edita a comezos do curso 2017/2018 con destino ás bibliotecas escolares dos centros educativos galegos. O ilustrador Xosé Tomás foi o encargado, nesta ocasión, de realizar a  interpretación gráfica do lema anual. 

A experiencia de Xosé Tomás como profesor de inglés no CPI Manuel Suárez Marquier (O Rosal), centro que conta cunha biblioteca moi activa, sen dúbida está detrás da amplitude de posibilidades que imaxina na súa recreación  gráfica.

Atender a biblioteca escolar do centro supón, para comezar, o reto de deseñar un espazo no que poidan pasar cousas. Un espazo que acolla a todos e todas e que mesmo (como na ilustración de Xosé Tomás), teña a capacidade de "abducir" as persoas usuarias, de trasladalas a situacións gratas de aprendizaxe. Seleccionar os materiais, organizar os recursos, facilitar o seu uso e organizar as actividades para a biblioteca escolar son tamén actuacións que, segundo o enfoque e o criterio co que se realice, poden facilitar ou dificultar esas aprendizaxes posibles.

Unha biblioteca  escolar actualizada no seu modelo, nos seus recursos e equipamentos, nas súas propostas; atendida con profesionalidade e integrada no día a día do centro educativo, supón unha oportunidade única para axudar a nenas e nenos a desenvolver o seu pensamento crítico, a "aprender a pensar".

Aprender a pensar a través dos contos, da tradición oral, das lecturas de ficción, da poesía, do teatro; a través das lecturas de materiais de divulgación científica, a través das investigacións. Aprender a pensar co cine e coa música. Aprender a pensar a través do diálogo, nos clubs de lectura, nas actividades compartidas. Aprender a pensar baixo a guía e orientación dun profesorado consciente da importancia da curiosidade como motor vital e, tamén, da importancia de activar no alumnado os mecanismos  para desenvolver o pensamento complexo. Aprender a pensar nas clases de filosofía, pero tamén fóra das aulas regladas, onde a vida flúe en todo o seu misterio. A biblioteca escolar é un espazo privilexiado para que o alumnado non perda a súa capacidade de asombro; para que aprenda a formularse preguntas diante dos distintos fenómenos naturais ou sociais e, tamén, a procurar algunhas respostas á complexidade que lle toca vivir.